WANAMICHEZO 831KJ WAAHIDIWA NEEMA

Mkuu wa Wilaya ya Kaliua Tabora, Venance Mwamoto akimkabidhi kombe la Ubingwa wa mashindano ya meya wa jiji la Dar es Salaam, kocha wa timu ya MM Mgulani, Maneno Omari baada ya timu yake kutwaa ubingwa wa mashindano hayo yaliyofanyika Agosti 5-8 mwaka huu kwenye Uwanja wa Ndani wa Taifa.  Kulia ni Mwenyekiti wa DABA, Akaloli Godfrey, wa pili toka kushoto ni Mkuu wa kambi ya 831KJ, Luteni Kanali, Erasmus Bwegoge na mwisho ni Afisa Mteule daraja la pili Elizabeth John. (Picha na Rahel Pallangyo)

Mkuu wa Wilaya ya Kaliua Tabora, Venance Mwamoto (katikati)
Kulia ni Mwenyekiti wa DABA, Akaloli Godfrey, na kushoto ni Mkuu wa kambi ya 831KJ, Luteni Kanali, Erasmus Bwegoge

Wanamichezo wakiwa wamesisima wakati mgeni rasmi akiingia pamoja na mkuu wa kambi

Wana michezo wakisikiliza kwa makini

MKUU wa kambi 831KJ, ya Mgulani, Luteni Kanali, Erasmus Bwegoge amewaahidi wanamichezo wa kikosi hicho ushirikiano wa hali na mali ili kuendelea kufanya vizuri kwenye michezo.

Luteni Kanali Bwegoge aliyasema hayo kwenye hafla ya kukabidhiwa kombe la mashindano ya meya yaliyoandaliwa na chama cha ngumi za ridhaa, mkoa wa Dar es Salaam (DABA) ambapo timu ya ngumi ya Mgulani ndio iliibuka bingwa wa jumla.

 “Kwanza naombeni mtambue mna mkuu wa kambi ambaye ni mdau wa michezo kwa kudhihirisha hilo nawaahidi kushirikiana nanyi katika michezo ili tulete sifa kwenye kambi, mkoa na hatimaye taifa kwa ujumla”, alisema Luteni Kanali Bwegoge

Awali akikambidhi kombe hilo, Mkuu wa wilaya ya Kaliua, Tabora, Venance Mwamoto ambaye pia ni mlezi wa DABA, aliwapongeza wachezaji hao kwa kuweza kutetea ubingwa wao na kuwataka kuendelea dhamira hiyo ya michezo kwani michezo inakwenda sambasamba na nidhamu  na jeshini ndipo nidhamu ilipozaliwa na kukulia.

“Wanajeshi najua wana nidhamu na michezo na nidhamu ni ndugu hivyo nitashirikiana na mkuu wenu wa kambi na chama cha DABA kuhakikisha mnashiriki mashindano mengi na ikiwezekana ya kimataifa”, alisema Mwamoto.

Naye Mwenyekiti wa DABA, Akaloli Godfrey aliipongeza timu ya JKT Mgulani kwa kuweza kuibuka bingwa kwa mara ya pili mfufulizo na kuwaahidi endapo wataweza kulitetea kombe hilo kwa mara ya tatu basi litakuwa la kwao.

Mashindano ya Meya yalifanyika Agosti 5-8 kwenye Uwanja wa ndani wa taifa na kushirikisha timu 13, MM Mgulani akaibuka bingwa wa jumla kwa pointi 19, nafasi ya pili ikachukuliwa  na Ngome ambayo ilipata pointi 18.