UNITED YAMFUNGA DE GEA KUTUA BARCELONA

Manchester, England

DAVID DE GEA yupo mbioni kuongezewa mshahara wake, ikiwa ni sehemu ya kumpongeza kwa kuonyesha kiwango bora na Manchester United msimu uliopita.

Kipa huyo wa Kimataifa wa Hispania, ana mkataba na Man United hadi 2016, lakini si miongoni mwa wachezaji wanaolipwa vizuri zaidi Old Trafford, kutokana na kitita chake cha pauni 55,000 anazopokea kwa wiki.

Lakini uongozi wa juu wa United, unatarajia kukaa chini na wawakilishi wa kipa huyo, 22, majira haya ya joto na kujadili uwezekano wa kupandisha maslahi yake hadi kufikia pauni 75,000 kwa wiki, ambazo wanaamini zitazima ndoto zake za kutaka kuhamia Barcelona.

Mhispania huyo ambaye ndiye kwanza amekiwezesha Kikosi cha Hispania U-21 kutwaa ubingwa wa Ulaya, alikuwa akihusishwa na Barca kwenda kurithi mikoba ya Victor Valdes, kabla ya kipa huyo kuamua kuitumikia kwa mwaka mmoja zaidi.

De Gea ambaye aliigharimu United pauni milioni 17.8 akitokea Atletico Madrid miaka miwili iliyopita, huduma yake bado inatamaniwa na wakali hao wa Nou Camp, lakini United ipo makini ikitambua kwamba atapewa nafasi kubwa wakati Valdes atakapoamua kuondoka.

MOURIHNO AWABWAGA MOYES NA PELLEGRINI KATIKA MAKOCHA WENYE NAFASI YA KUTWAA UBINGWA WA ENGLAND

 

London, England

JOSE MOURINHO amewabwaga makocha wapya wenzake katika kura zilizopigwa kubashiri kocha mwenye nafasi kubwa ya kutwaa ubingwa wa Ligi Kuu England msimu ujao.

Makocha waliopigiwa kura ni Mourinho wa Chelsea, David Moyes wa Manchester United na Manuel Pellegrini wa Manchester City ambao wamejiunga na klabu hizo majira haya ya joto.

Mashabiki wanaoaminika kwa upigaji kura za utabiri nchini England, walimpa Mounrinho asilimia 52 ya kura 2,000 zilizopigwa.

Moyes alipata kura 28, huku Kocha wa zamani wa Malaga, Pellegrini aliyetua City akiambulia kura 14.

Kadhalika mashabiki wengi walitabiri kuwa Mshambuliaji wa Kimataifa wa England, Wayne Rooney, atakuwa bora zaidi endapo ataamua kubaki Manchester United

OKWI APATA SOKO ULAYA HUKU MSIMBAZI MAMBO YAKIZIDI KUNOGA

SIMBA imecheza rafu, baada ya kuzuia mikataba ya nyota watano wa Yanga, kwa ajili ya msimu ujao wa Ligi Kuu Tanzania Bara.

Hatua hiyo, inatokana na wachezaji hao ambao ni Frank Domayo, Simon Msuva, Kelvin Yondani, Ally Mustapha ‘Barthez’ kuanza mazungumzo na viongozi wa Simba.

Wachezaji hao ambao wamo kwenye kikosi cha timu ya Taifa ‘Taifa Stars’, inadaiwa wamekataa kuendelea kuichezea Yanga pindi mikataba yao itakapomalizika.

Domayo ambaye ni kiungo tegemezi katika Kikosi cha Yanga na Stars, alijiunga na timu hiyo katika msimu uliopita wa Ligi Kuu Tanzania Bara akitokea JKT Ruvu na Msuva Moro United, kisha kusaini mkataba wa miaka miwili kila mmoja.

Kwa upande wa Yondani na Barthez, walijiunga na timu hiyo wakitokea Simba  katika msimu uliopita na kuiwezesha timu hiyo kuchukua ubingwa wa ligi kuu.

 Habari zilizopatikana kutoka ndani ya uongozi wa Simba, zilieleza kwamba, wachezaji hao wameonyesha nia ya kutaka kuichezea timu yao ya zamani, wakiamini wataweza kufikia malengo waliyojiwekea ya kucheza soka katika klabu kubwa za Afrika na Ulaya.

Chanzo hicho kilieleza kwamba, wanachosubiri wachezaji hao kwa sasa ni kumaliza mikataba yao ili waweze kusaini Simba, hasa wakizingatia baadhi yao ni wanachama hai wa klabu hiyo.

Kilieleza kwamba, wachezaji hao wameona Simba ni klabu pekee inayoweza kuwauza na wakacheza soka kwa mafanikio makubwa kama ilivyokuwa kwa wenzao, Mbwana Samatta na Emmanuel Okwi.

Samatta aliuzwa na Simba katika misimu mitatu iliyopita ya Ligi Kuu Tanzania Bara, katika Klabu ya TP Mazembe ya Jamhuri ya Kidemokrasia ya Congo, baada ya kung’ara katika michuano ya Ligi ya Mabingwa na Kombe la Shirikisho barani Afrika, ambapo Okwi aliuzwa Etoile de Sahel ya Tunisia ambaye sasa anatarajiwa kuuzwa Ulaya katika Klabu ya Partizan Beograd ya nchini Serbia.

Taarifa zilizolifikia zilidai kuwa Etoile de Sahel ipo katika mazungumzo na klabu hiyo ya Serbia, ambayo inataka kumsajili Okwi baada ya kumvutia Kocha wao, Vuk Rasovic.

Partizan Beograd imetwaa ubingwa wa Serbia msimu uliomalizika baada ya kumaliza ligi hiyo inayoshirikisha timu 16 ikiwa na pointi 73, zikiwa ni pointi 11 mbele ya Crvena Zvezda iliyomaliza ya pili na 12 dhidi ya Vojvodina Novi Sad ambayo imeshika nafasi ya tatu.

Chanzo hicho kilieleza kwamba, wachezaji wengi wanaounda kikosi cha kwanza cha Yanga kama Mrisho Ngassa, Athumani Idd ‘Chuji’, Nadir Haroub ‘Cannavaro’, Yondani na Barthez na Kipa mpya wa timu hiyo, Deogratius Munishi ‘Dida’ ni wanachama hai wa Klabu ya Simba

KIBADENI AANZA TAMBO MSIMBAZI

NILETEENI Yanga muone kazi yangu! Hivyo ndivyo unaweza kusema baada ya Kocha Mkuu wa Simba, Abdallah ‘King’ Kibadeni, kusema vijana wake wameiva kwa ajili ya Ligi Kuu Tanzania Bara.

Simba katika msimu uliopita ilipokea kipigo cha mabao 2-0, katika mchezo wa marudiano wa Ligi Kuu uliochezwa Mei 18, mwaka huu, kwenye Uwanja wa Taifa, Dar es Salaam, ikiwa chini ya Kocha Mkuu wake, Mfaransa, Patrick Liewig.

Lakini Kibadeni ameanza kujiamini mapema kuwa kikosi chake kinaweza kubadilisha matokeo ya msimu uliopita, baada ya kujiridhisha vijana wake wameiva kwa ajili ya ligi hiyo.

 Akizungumza Dar es Salaam jana, Kibadeni alisema kutokana na uwezo uliooneshwa na vijana wake  kwa takribani mwezi mmoja katika mazoezi yanayoendelea kwenye Uwanja wa Kinesi, hana shaka kabisa ya kuanza kwa ligi hiyo.

Kibadeni alisema vijana wake wapo tayari kucheza, ingawa anaendelea na mazoezi makali ya kuwajengea nguvu ya mwili  katika Gym ya Chang’ombe na baadaye mazoezi ya kawaida Uwanja wa Kinesi.

Kibadeni alisema anajivunia timu hiyo, kwani inaundwa na wachezaji wengi chipukizi licha ya kuwemo wengine wakongwe kama Nassor Masoud ‘Chollo’, Mwinyi Kazimoto, Amri Kiemba, Musa Mude, Abel Dhaira na Haruna Shamte.

Alisema hana hofu kabisa kuhusu kutemwa kwa kipa na nahodha wa timu hiyo, Juma Kaseja kwa kuwa anao makipa watatu katika kikosi chake, akiwemo Andrew Ntalla aliyesajili msimu huu, akitokea Kagera Sugar.

Kikosi kipya cha timu hiyo kinaundwa na wachezaji  Zahor Pazi, aliyesajiliwa kutoka (Azam FC), ambaye msimu uliopita alikuwa akicheza kwa mkopo katika klabu ya Ruvu Shooting na Augustino Sino (Tanzania Prisons).

Wengine ni Kipa Andrew Ntalla (Kagera Sugar), Samuel Ssenkoom (URA ya Uganda), Adeyoon Salehe (Miembeni ya Zanzibar), Ibrahim Twaha ‘Neymar’ (Coastal Union) na Issa Rashid ‘Baba Ubaya’ (Mtibwa Sugar).

Kadhalika wamo, Shomari Kapombe, Kiemba, Kazimoto, Chollo, Salum Kinje, Haruna Shamte, Mude na Dhaira huku akiwapandisha wachezaji wengi wa kikosi cha pili cha timu hiyo, Miraji Adam, Hassan Khatib, Willian Lucas, Daid Ndemla, Abdallah Seseme, Hassan Isihaka, Marcel Kahenza, Ramadhan Singano ‘Messi’, Haruna Chanongo, Jonas Mkude, Christopher Edward, ambao baadhi yao walipandishwa katika misimu miwili iliyopita.

NIZAR KHALFAN NA OSCAR JOSHUA WAJITIA KITANZI

Nizar Khalfan (kulia)

KIUNGO wa Yanga, Nizar Khalfan na beki wa timu hiyo, Oscar Joshua wameendelea kuula baada ya kuongezwa mikataba mipya kwa ajili ya msimu ujao wa Ligi Kuu Tanzania Bara, huku Shadrack Nsajigwa akitemwa kwenye kikosi hicho.

Msimu uliopita Nsajigwa aliongezwa mkataba wa mwaka mmoja, baada ya kuichezea timu hiyo kwa muda mrefu akitokea Moro United, hata hivyo, LENZI YA MICHEZO ina taarifa kwamba anatarajiwa kupewa jukumu la kuwa kocha msaidizi wa timu hiyo.

Nsajigwa wiki iliyopita alimaliza kozi ya ngazi ya pili ya ukocha iliyoandaliwa na Chama cha Soka Mkoa wa Dar es Salaam (DRFA), itakayomwezesha kukaa kwenye benchi la ufundi la timu hiyo katika mechi za Ligi Kuu Tanzania Bara.

 Habari zilizopatikana Dar es Salaam kutoka ndani ya Kamati ya Usajili iliyochini ya Mwenyekiti wake, Abdallah Bin Kleb, zilieleza Joshua na Nizar wameongezewa mkataba kwa kuwa bado wana mchango mkubwa katika kikosi cha timu hiyo.

Chanzo hicho kilieleza kwamba, wachezaji hao wameongezewa mkataba kutokana na mapendekezo ya Kocha Mkuu wa timu hiyo, Ernie Brandts, aliyeiwezesha Yanga kuchukua ubingwa msimu uliopita.

 “Wachezaji hao mikataba yao ilikuwa imemalizika, tumeamua kuwaongezea ili waweze kuisaidia timu yetu katika msimu ujao wa ligi kuu na Ligi ya Mabingwa mwakani,” kilieleza chanzo chetu.

Kilieleza kwamba baadhi ya wachezaji akiwemo Stephano Mwasyika, Godfrey Taita, Said Mohamed, hawajaongezewa kutokana na mikataba yao imemalizika huku wakionekana si msaada tena kwa timu.

Wakati huo huo, Brandts anatarajia kutua nchini leo  akitokea kwao Uholanzi alikokuwa kwenye mapumziko, baada ya kumalizika kwa msimu wa Ligi Kuu Tanzania Bara.

Yanga ambao ni mabingwa wa ligi hiyo, wanatarajia kuanza mazoezi kesho kujiandaa na msimu ujao.

BOBAN: "KASEJA AKIJA COASTAL UNION NAONDOKA"

BAADA ya Juma Kaseja kutemwa katika usajili wa msimu ujao wa Ligi Kuu Tanzania Bara, Mwenyekiti wa Kamati ya Usajili wa klabu hiyo, Zakaria Hanspope, ameanika sababu za kushindwa kumwongeza mkataba mpya, huku kiungo mshambuliaji wa zamani wa timu hiyo aliyetua Coastal Union, Haruna Moshi ‘Boban’ akisema hayupo tayari kucheza naye kikosi kimoja.

Akizungumza Dar es Salaam jana, Hanspope alisema Kaseja alikuwa akiwapiga chenga walipomhitaji kufanya naye mazungumzo baada ya mkataba wake kufikia ukingoni.

Hanspope alisema walimwita ili kufikia mustakabali wake wa kuendelea kuichezea timu hiyo, lakini hakuwa tayari na baadaye waliamua kuachana naye, wakiamini amepata timu nyingine.

Hanspope alisema Mei mwaka huu, walimwita kwa ajili ya mazungumzo lakini hakuitika wito huo, kwa madai alikuwa katika majukumu ya timu ya Taifa ‘Taifa Stars’, na ilikuwa inakabiliwa na mechi mbili za kuwania kufuzu fainali za Kombe la Dunia.

Taifa Stars ilikuwa na mechi ngumu dhidi ya Morocco, ambapo ilifungwa mabao 2-1, katika mchezo wa marudiano uliochezwa kwenye Uwanja wa Stade de Grand mjini Marrakech na baadaye ilizamishwa na Ivory Coast mabao 4-2, kwenye Uwanja wa Taifa, Dar es Salaam.

Kaseja ambaye mkataba wake ulimalizika rasmi jana, baada ya kuichezea timu hiyo tangu mwaka 2002 akitokea Moro United, mara ya mwisho kukutana na mwenyekiti wa usajili wa klabu hiyo, ilikuwa wakati Stars ikijiandaa kucheza na Morocco.

 “Nilimwambia Kaseja sisi bado tuna nia ya kuendelea na wewe msimamo wako ni upi? Alinijibu hawezi kusema lolote kwa kuwa alikuwa katika majukumu ya timu ya taifa, akimaliza atanijibu,” alisema Hanspope.

Alisema aliendelea kuwa na msimamo wake usioeleweka baada ya kumaliza majukumu ya kuitumikia timu ya taifa, ikiwa ni zaidi ya wiki mbili, hakuwahi kukaa katika meza moja ya mazungumzo na uongozi wa klabu hiyo licha ya kumtaka kufanya hivyo.

Hanspope alisema waliamini kwamba, amemaliza mkataba wake na wanamwita hataki labda alikuwa na mipango yake mingine na waliamua kumwacha ili aendelee na utaratibu wake.

Hata hivyo, alisema uwezo wa Kaseja umeshuka mno tofauti na ilivyokuwa katika miaka ya nyuma, hali inayompa wakati mgumu kwa mashabiki wa timu hiyo.

 Msimu uliopita wa Ligi Kuu Tanzania Bara, mashabiki walitaka kumpiga baada ya kufungwa na Mtibwa Sugar mabao 2-0, katika mchezo wa kwanza, uliochezwa kwenye Uwanja wa Jamhuri mjini Morogoro.

Wakati huo huo, Kiungo mshambuliaji wa zamani wa Simba, Haruna Moshi ‘Boban’ aliyesajiliwa na Coastal Union katika majira haya ya joto kwa mkataba wa msimu mmoja, ameeleza kuwa hataki kumwona Kaseja akijiunga na timu hiyo.

Habari zilizopatikana jana kutoka kwa marafiki wake wa karibu LENZI YA MICHEZO kuzinasa, zilidai kwamba Boban amechukizwa na mambo aliyofanyiwa na Kaseja wakati akiwa nahodha wa Simba wa muda mrefu na ameweka wazi kuwa endapo atajiunga na Coastal, yeye ataacha kuichezea miamba hiyo ya Tanga.

Boban ni miongoni mwa wachezaji wa Simba waliotemwa na klabu hiyo, wengine wakiwa ni Felix Sunzu na Amir Maftah, baada ya mikataba yao kumalizika huku Juma Nyosso, Abdallah Juma na Paul Ngalema wakishindwa kuomba kuvunja mikataba yao miamba hiyo ya Msimbazi.

REDNAPP AMPELEKA CESAR ARSENAL NA DAVID VILLA AKUBALI KUTUA SPURS

London:

KOCHA wa QPR, Harry Redknapp amethibitisha kuwa Julio Cesar ataihama klabu hiyo majira haya ya joto, wakati huu ambao Arsenal ikiaminika kuongoza katika mbio za kuipata huduma ya kipa huyo raia wa Brazil.

"Julio Cesar ataondoka," Redknapp alisema. "Ni kipa wa kiwango cha juu, namba moja wa Brazil. Amekuwa katika klabu kubwa na nyingi zinamhitaji kwa sasa, hataweza kucheza ligi daraja la kwanza (Championship)."

@@@@@@@@

David Villa akubali kutua Spurs

Barcelona: MSHAMBULIAJI wa Barcelona, David Villa, 31, wiki hii atatoa uamuzi wake endapo atatua Fiorentina ama Tottenham.

Hata hivyo, Villa ambaye jana alitarajiwa kuichezea Hispania dhidi ya Brazil kwenye mechi ya fainali ya Kombe la Mabara, yupo tayari kutua Spurs badala ya Fiorentina na Barca inatarajia kuingiza pauni milioni 12 kama ada ya uhamisho.

DAVIS MOYES AKUTANA NA ROONEY KWA SIRI

 

Manchester, England

DAVID MOYES na Wayne Rooney wamekuwa na mkutano wa siri katika harakati za kocha huyo mpya wa Manchester United kutaka kuhakikisha anambakisha mshambuliaji huyo Old Trafford.

Msimu uliopita, Rooney alitibuana na Alex Ferguson, jambo lililomfanya aweke wazi dhamira yake ya kutaka kuondoka Old Trafford.

Taarifa za ndani zimeeleza: “Kuna hofu ndogo kwa kocha kutaka kumbakisha Wayne. Wamekutana kwa siri lakini nafasi kubwa imetolewa kwa Wayne kuamua mwenyewe kutoka moyoni.

“Mara zote amekua akitaka kuwekwa sokoni, hana furaha ya kutemwa katika mechi kubwa kama ile dhidi ya Real Madrid.”

Mshambuliaji huyo wa England, Rooney, 27, ambaye anawindwa na Arsenal, Chelsea, PSG na sasa Barcelona, anatarajiwa kukutana tena na Moyes wiki hii.

TORRES ATAKIWA ARSENAL AKACHEZE SAMBAMBA NA GONZALO HIGUAIN

London, England

KOCHA wa Chelsea, Jose Mourinho anaamini kuwa wachezaji watano katika Kikosi chake cha Stamford Bridge, ndiyo wenye uhakika wa kupata nafasi ya kuanza, jambo linalomfanya amkubalie Arsene Wenger kumpigia kasi Mhispania, Fernando Torres.

Bosi huyo wa Arsenal, Wenger anaitaka huduma ya Torres Emirates, wameripoti Dean Jones na Dave Kidd wa Gazeti la The Sunday People.

Hata hivyo, Mourinho yupo tayari kumruhusu Mhispania huyo kuondoka baada ya kubainika kuwa katika mipango yake, hadi sasa wachezaji wenye uhakika wa kuanza kwenye kikosi chake ni Petr Cech, Ashley Cole, Frank Lampard, Eden Hazard na Oscar.

Mchezaji mwenye Kipaji raia wa Hispania, Juan Mata na Beki wa Kati wa Kimataifa wa Brazil, David Luiz pia si miongoni mwa watakaounda kikosi chake, hivyo watapewa mkono wa kwaheri majira haya ya joto. Mourinho anaamini Oscar anastahili kucheza namba 10, kutokana na kuwa bora kuliko Mata.

Lakini hizo ni taarifa nzuri kwa Arsenal ambayo imejipanga kuelekea kwa Torres, ambaye wanaamini ataweza kutengeneza kombinesheni nzuri Emirates akicheza sambamba na Mshambuliaji wa Real Madrid, Gonzalo Higuain wanayetarajia kumsajili.

Bodi ya The Gunners ipo tayari kuona timu yao ikisajili nyota wengi, baada ya hivi karibuni kushuhudia wachezaji wao wenye majina makubwa wakiihama klabu hiyo.

Torres, ambaye yupo Brazil kwa majukumu ya kitaifa ambapo timu yake, Hispania jana ilicheza mechi ya fainali ya Kombe la Mabara dhidi ya wenyeji hao, hana uhakika kama yupo kwenye mipango ya baadaye ya Chelsea, hivyo anatarajia kuzungumza na Mourinho wiki hii na Arsenal itampigia kasi 'fasta' kama atatemwa.

Chaguo la kwanza kwa Arsenal ni Higuain, lakini Torres na Wayne Rooney wa Man United pia wapo katika mipango yao.

Katika hatua nyingine, Mourinho sasa atahitaji kusajili wachezaji sita kabla ya dirisha la usajili kufungwa na anatambua wazi kuwa, pauni milioni 35 atakazozipata kutokana na kumuuza Luiz kwa Barca, zitamtosha kuboresha kikosi chake.

Nyota wa Brazil, Hulk anayeichezea Zenit St Petersburg, Mario Gomez wa Bayern Munich na Mshambuliaji wa AC Milan, Stephan El Shaarawy wote wapo katika rada za Mourinho, sambamba na Kifaa cha Manchester City, Edin Dzeko.

NEYMAR JINAMIZI JIPYA KWA RONALDO LA LIGA

PALE Mbrazil Neymar alipotangaza uamuzi wake wa kutua Nou Camp msimu ujao, hamasa iliongezeka La Liga, kutokana na hamu ya kuwaona mastaa hao wawili wakizitesa beki za timu kadhaa ndani ya ligi hiyo.

Neymar ataungana na jirani yake Muargentina, Lionel Messi kuwapa shida mabeki kwa chenga za maudhi na kuwanyima usingizi makipa wa timu kadhaa za La Liga kwa mabao ya dharau watakayokuwa wakitupia kila mwisho wa wiki.

Wakati makipa na mabeki wakiwa kwenye hali mbaya kutoka kwa watu hawa wawili, pia Neymar ni jinamizi jipya kwa Cristiano Ronaldo ambaye amekuwa akijaribu kuchukua ufalme wa Messi kwa misimu kadhaa sasa.

Kikosi cha Real Madrid pamoja na Ronaldo wako kwenye mchakato wa kuibuka upya, baada ya kuondokewa na kocha wake, Jose Mourinho na kurudi kwenye mchakato wa kuchukua mataji baada ya kupita patupu msimu uliopita, lakini ujio wa Neymar pale Barcelona ni bonge la changamoto kwa Real.

Ronaldo amekuwa akipigana kufa au kupona dhidi ya Messi, ikiwa katika harakati zake za kuhakikisha anatajwa kama kchezaji bora zaidi kwenye La Liga na cha muhimu zaidi kuibeba timu yake itawale mbele ya wapinzani wao wa jadi Barca.

Ujio wa Mourinho ulileta imani kubwa miongoni mwa mashabiki wa Real Madrid na kitendo cha kuchukua ubingwa La Liga baada ya Barca kufanya hivyo mara tatu mfululizo, ilikuwa kama mwanzo wa kipindi kizuri zaidi.

Lakini msimu mbaya uliopita ambao timu ilimaliza bila taji lolote na kushuhudia The Special One akirudi zake London, na kuiacha Madrid ikiwa vibaya, wakati Barca wakiendelea kuimarisha timu ni jinamizi kubwa sana kwa Ronaldo.

Madrid wanaweza kutumia fedha na kutengeneza timu ya kutisha zaidi, lakini Ronaldo kwa sasa yuko kwenye wakati mgumu zaidi wa kulazimika kuibeba Real katika kipindi hiki cha mpito.

Atakuwa na jukumu la kuiongoza Los Blancos msimu ujao, jukumu hilo ni kubwa sana hasa kutokana na ukweli kwamba kuteleza au makosa yoyote yale yatajibiwa na Messi na Neymar kwa kuihakikishia Barcelona inapata pointi zote tatu kiulaini.

Kwa ubora alionao, Ronaldo atakaa kimya na kuacha kipaji chake kiongee uwanjani. Hasa kipindi hiki wakati msimu mpya ukizidi kukaribia, watu wanasubiri kwa hamu kuona El Classico ya kwanza.

Msimu huu El Classico zitakuwa ni mechi kati ya Barca wanaotisha dhidi ya Ronaldo anayeutaka ufalme wa La Liga.

Lakini mechi hizo zitatimia iwapo tu Ronaldo atabaki Santiago Bernabeu, katika kipindi hiki cha usajili.

Kuna dalili za Ronaldo kuondoka Real Madrid wakati huu wa kiangazi, uvumi wa yeye kutua Old Trafford umekuwa ukiongezeka wiki hadi wiki hasa baada ya David Moyes kuanza kazi rasmi leo.

Kwa wiki kadhaa sasa kumekuwa na taarifa kwamba, Man United wanaamini kuwa wanaweza kumrudisha Ronaldo Old Trafford, baada ya kuondoka mwaka 2009 na kutua Madrid kwa ada ya pauni milioni 80.

Taarifa ya gazeti la Kihispaniola la El Pais, Jumatano iliyopita liliandika kwamba, Ronaldo atakutana na viongozi wa Manchester United ambao watamalizana naye kwenye ishu nzima ya usajili wake.

Man United hawajazungumza lolote kuhusu taarifa hiyo, japokuwa kuna kila dalili kwamba uhamisho wa Ronaldo kurudi Old Trafford utakutana na upinzani mkali wa Paris St Germain, ambao nao wanamlilia mchezaji huyo bora wa zamani wa dunia.

Kocha mpya wa Real Madrid, Carlo Ancelotti anaweza kuamua kumbakiza Ronaldo katika kipindi hiki atakachokuwa akitengeneza timu iliyoachwa na Mourinho, hata hivyo Ancelotti hana kauli ya mwisho, Ronaldo mwenyewe ndiye anaweza kuamua kuondoka au kubaki.

Lakini mambo bado hayaeleweki, Moyes anayeanza kazi rasmi leo pale Man United, jukumu lake la kwanza litakuwa kumaliza sakata la usajili la Wayne Rooney ambaye kama Ronaldo amekuwa akihusishwa na kuondoka kwenye timu hiyo.

PSG, Bayern Munich, Chelsea na Arsenal zote zinahusishwa na mshambuliaji huyo wa Kimataifa wa England, pia kuna taarifa kwamba, Moyes anataka kumbakiza mchezaji huyo ambaye alimtambulisha kwenye soka la kulipwa alipokuwa Everton.

Man United wamekuwa wakiweka hadharani nia yao ya kumbakiza Rooney na pia kutaka kumsajili Ronaldo, hapa swali lanabaki je, Ronaldo ataachiwa na Florentino Perez aondoke Madrid?

Ronaldo anatakiwa kuamua iwapo anakimbia jinamizi jipya La Liga, au anabaki na kupambana na jinamizi hili jipya (Neymar) ambalo litakuwa limeungana na lile la zamani (Messi) na kuhakikisha kwamba anaibuka kidedea.

Wakati La Liga kuna jinamizi wawili, uvumi wa kurudi Old Trafford bado umemng’ang’ania Ronaldo ambaye anahitaji kufanya maamuzi magumu kwenye kipindi hiki cha soka lake.

Kiwango alichokionyesha Neymar kwenye michuano ya Kombe la Mabara ni uthibitisha tosha kuwa Ronaldo anakazi kubwa sana kujipambanua kama mchezaji bora wa La Liga iwapo atabaki Santiago Bernabeu.

JE, VAN PERSIE ATAJUTA KUONDOKA ARSENAL?

MANCHESTER, England

UHAMISHO wa Robin van Persie kutoka Arsenal kwenda Manchester United, ndio uliotawala vichwa vya habari msimu uliopita.

Baada ya miaka nane akiwa London Kaskazini chini ya Arsene Wenger, Mholanzi huyo aliamua kukataa kusaini mkataba mpya na hivyo kuuzwa Man United kwa pauni milioni 24.5.

Alikuwa ameshinda tuzo ya ufungaji bora kwenye msimu wake wa mwisho akiwa na The Gunners na kushinda tena kiatu cha dhahabu msimu uliopita akiwa na Red Devils, baada ya kufunga mabao 26 kwenye mechi 38 alizocheza.

Lakini mwisho wa msimu uliopita, Sir Alex Ferguson alitangaza kustaafu kufundisha soka baada ya miaka 26 akiwa na Manchester United. Fergie alikuwa gundi iliyoiunganisha timu pamoja na bila shaka kocha bora wa muda wote wa Uingereza.

Upande wa pili, msimu wa 2011-12 ulikuwa msimu mwingine mbovu Emirates, huku Arsenal wakiishia kumaliza kwenye nafasi ya nne na kufuzu Ligi ya Mabingwa Ulaya ambako wataanzia kwenye hatua ya mtoano, walimaliza mbele ya Tottenham.

Van Persie alishinda taji lake la kwanza la Ligi akiwa na miaka 29, hii ni baada ya miaka karibu 10 ndani ya Ligi Kuu England. Siku ambayo timu hiyo ilikuwa ikipitisha ubingwa kwenye mitaa ya Jiji la Manchester, hakuna ubishi kuwa Mholanzi huyo alikuwa hajutii maamuzi yake ya kung’ang’ania kuondoka Arsenal.

Lakini miezi au miaka kadhaa anaweza kubadilika kwa kile anachokifikiria kuhusu uamuzi wake wa kuondoka Emirates.

Arsenal imekuwa ikibanwa na mkataba wa ufadhili wa Uwanja wa Emirates na Wenger (kwa hiyari yake) amekuwa akibana matumizi ya klabu hiyo kila dirisha la usajili linapofunguliwa. Lakini hali sasa hivi inabadilika.

Arsenal wanahusishwa na usajili wa mastaa kama Gonzalo Higuain kutoka Real Madrid, Marouane Fellaini kutoka Everton na hata staa mwenzake Van Persie pale Old Trafford, Wayne Rooney. Kumekuwa na mabadiliko kwenye suala la matumizi na rasilimali, bata zote sasa hivi ziko Arsenal na kama angebaki kwa msimu mmoja zaidi angeshiriki kwenye kula bata pande za Emirates.

Huku Old Trafford alipo sasa hivi timu iko kwenye kipindi cha mpito, kipindi cha kusahau utawala wa Ferguson na kuingia kwenye zama za utawala wa David Moyes.

Kuna uwezekano mkubwa sasa kwa kiwango cha Manchester City kupanda chini ya kocha mpya Manuel Pellegrini, ambaye tayari ametumia kiasi cha pauni milioni 45 kwa kuwaleta Etihad, Fernandinho na Jesus Navas halafu bado wanaweza kununua zaidi kwa sababu dirisha la usajili bado sana kufungwa.

Jose Mourinho amerudi kuiongoza Chelsea, ni wazi kuwa atatoa upinzani mkali kwa Man United msimu ujao. Yote kwa yote uwezekano wa Man United kutetea ubingwa wao ni mdogo zaidi msimu ujao. Kumekuwa na mabadiliko makubwa sana, siyo Old Trafford tu, bali kwenye timu zote zilizomaliza ‘top 4’ msimu uliopita.

Arsene Wenger, mlezi wa Van Persie bado yuko Arsenal amechukua cheo cha kocha aliyedumu kwa muda mrefu zaidi na timu kwa sasa, baada ya Fergie kuondoka. Arsenal wanafedha ya kutumia na wanatarajiwa kutoa upinzani wa kweli kwenye ubingwa msimu ujao.

Tukiwa wa kweli katika ishu hii, ni ngumu kuamini iwapo Van Persie kuna siku atajutia kuondoka Arsenal, watu wanaamini kuwa aliondoka kwa sababu alikuwa akiamini alikuwa ameshapata kila alichotaka akiwa The Gunners na alikuwa akitafuta kubadilisha mazingira. Mwenyewe alisema aliondoka Emirates kwa sababu alikuwa akitaka mataji na amepata moja tayari.

Hata hivyo, ni ngumu kuamini kama amepata kile alichokitaka kutoka kwa Ferguson pale Old Trafford, watu wanahofu huenda akawa anajuta kwa sababu Van Persie hakupata muda wa kutosha wa kujifunza kutoka kwa kocha huyo aliyeachana na soka.

Kama mataji yakiendelea kutua Old Trafford chini ya David Moyes hatojutia uamuzi wake, lakini iwapo Chelsea, Man City na hata Arsenal wakifanikiwa kuitoa Man United kwenye ufalme wa England, RVP anaweza kujikuta anajuta kutokana na kushindwa kupata mataji mengi zaidi kama alivyotarajia wakati akitua Man United.

RVP anaweza kujiona kama mtu aliyepishana na gari la mshahara, kwa kuja Man United kipindi ambacho Ferguson anakaribia kustaafu na Arsenal wanaachana na ubahili, huku kukiwa na kila dalili za mafanikio kuhamia Emirates.

BRAZIL MABINGWA WA MABARA BAADA YA KUIFUNGA HISPANIA MABAO 3-0

BRAZIL imetwaa Kombe la Mabara jana usiku baada ya kuifunga Hispania mabao 3-0 kwenye mchezo wa fainali uliochezwa Uwanja wa Maracana  mjini Rio de Janeiro, Brazil.

Kwenye mchezo huo, mabingwa wa Dunia na Ulaya walipoteza mchezaji mmoja na pia wakashindwa kufunga kwa penalti.

Katika mchezo huo Fred aliyefunga mabao mawili, la kwanza dakika ya pili na la tatu dakika ya 47 kwa pasi iliyotoka kwa Hulk na Neymar aliyefunga la pili dakika ya 44 baada ya kupokea  pasi iliyotoka kwa Oscar.

Pique alitolewa nje dakika ya 68 kwa kumchezea rafu, Neymar na dakika ya 54 Marcelo alimuangusha kwenye eneo la penalti Navas, lakini Sergio Ramos akakosa penalti kwani shuti lake lilitoka nje.

Kikosi cha Brazil kilikuwa: Julio Cesar; Dani Alves, Thiago Silva (capt), David Luiz, Marcelo; Oscar, Luiz Gustavo, Paulinho; Fred, Neymar, Hulk.

Hispania: Iker Casillas; Alvaro Arbeloa/Azpilicueta dk46, Gerard Pique, Sergio Ramos, Jordi Alba; Xavi, Sergio Busquets, Andres Iniesta; Juan Mata, Fernando Torres na Pedro.

Fred  alifunga mabao mawili

Gerard Pique alionyeshwa kadi nyekundu baada ya kumuumiza Neymar

Sergio Ramos  penalti yake iliota mbawa

Fred akishangilia bao lake la pili kwa timu yake Brazil ambalo pia ni la tatu

David Luiz aliokoa shuti la Pedro

Neymar akishangilia na mashabiki Maracana

Polisi wa kutuliza ghasia wakipuliza gesi ya moto kudhibiti fujo nje ya Uwanja wa Maracana

Fred akifunga

Fred alifunga dakika ya pili tu bao la kwanza

Fred akishangilia na Neymar

MASANJA MKANDAMIZAJI NA SHILOLE WAENDA MAREKANI KWENYE SHEREHE YA TAMASHA LA UTAMADUNI WA KISWAHILI

 

Wasanii Masanja Mkandamizaji na Shilole wakikwea pipa kuelekea Washington, DC kwenye sherehe ya miaka 3 ya Vijimambo na Tamasha la Utamaduni wa Kiswahili Marekani litakalofanyika July 6, 2013 kuanzia saa 4 asubuhi (10:00 am) na Rais Mustaafu Ali Hassan Mwinyi ndiye atakayekua mgeni wa rasmi. Mhe. Ali Hassan Mwinyi anatarajiwa kufika Washington, DC siku ya Alhamisi July 4, 2013.

TOTTENHAM YAINGIA VITANI NA LIVERPOOL YA KUMNASA MKHITARYAN

Ni vita baina ya Tottenham na Liverpool wakimtaka Henrikh Mkhitaryan (kushoto pichani) akitokea Shakhtar Donetsk.

Tottenham imeingia vitani kumnasa Mkhitaryan wakati Liverpool wakiongoza vita hiyo kwa ada ya mezani ya pauni milioni £20.Tottenham inajipanga kutia sumu mpnago wa Liverpool wa pauni £20 kumchukua nyota wa Shakhtar Donetsk kiungo mchezeshaji Henrikh Mkhitaryan.

Bosi wa Anfield Brendan Rodgers ameonekana kuwa kinara wa kukamilisha usajili wa mchezji huyo ambaye anaonekana kuwa ni mwenye kipaji ilhali Spurs kwasasa nao wanaonekana kuwa mbionioni kumnasa nyota huyo wa kimataifa wa Armenia.

Imefahamika kuwa mshauri wa Mkhitaryan amekuwa katika mazungumzo na wakuu wa Tottenham juu ya kusaka uwezekano wa kumpeleka White Hart Lane msimu ujao.
Spurs kwasasa pia wako katika mpango wa kumkamata Puulinho wa Corinthians kwa ada ya uhamisho wa pauni milioni £17 ambaye anatazamiwa kukamilisha mipango ya kuanguka saini baada ya fainali ya michuano ya kombe  la mabara hapo kesho Jumapili. 
Taarifa nyingine zinasema washindi wa pili wa ligi ya mabingwa Ulaya Borussia Dortmund nao wameweka mezani pauni milioni £19.5 kwa ajili ya kiungo huyo mwenye umri wa miaka 24.
Lakini Shakthar wamesisitiza kuwa wanahitajia angalau pauni milioni £25 kwa ajili ya mchezaji huyo ambaye anatakiwa na vilabu vya England kama vile Chelsea na Manchester City.
Spurs wanasalia na matumaini mengine ya kumchukua David Villa pamoja na mshambuliaji mwingine wa Galatasaray Burak Yilmaz mwenye umri wa miaka 27.

VICTOR WANYAMA WA KENYA ANAYECHEZA KLABU YA CELTIC AGOMBEWA NA KLABU ZA LIGI KUU YA UINGEREZA

MCHEZAJI wa Kimataifa wa Kenya, Victor Wanyama, anaechezea Klabu ya Scotland, Celtic, yuko mbioni kujiunga na Klabu za BPL, Barclays Premier League baada ya Ofa kadhaa kumiminika za kumnunua.

Hivi Juzi, Ofa ya Southampton ya Dau la Pauni Milioni 12 ilikubaliwa na Klabu ya Celtic lakini Wanyama, mwenye miaka 21, alishindwa kukubaliana na Southampton kuhusu Maslahi yake binafsi. 

Hivi sasa, Klabu iliyopanda Daraja Mei na Msimu ujao wa 2013/14 unaoanza Agosti itacheza BPL, Cardiff City imetoa Ofa mpya kwa Celtic baada ya kwanza kugomewa na pia imependekeza maslahi ambayo yanakubalika na Wanyama.

Wanyama alijiunga na Celtic Mwaka 2011 kwa Dau la Pauni Milioni 1 kutoka Klabu ya Ubelgiji Germinal Beerschot na hivi sasa amebakisha Mkataba wa mwaka mmoja na Celtic ambao ndio Mabingwa wa Scotland.

Celtic wameshakiri kuwa Mkenya huyo ataihama Klabu yao lakini hivi karibuni kwani wamekuwa wakikwaruzana na Wakala wa Wanyama, Ivan Modia.

Modia amekuwa akidai Wanyama amekaa Celtic Miaka miwili bila ya kuongezewa Mshahara na pia Mwaka Jana alikataliwa kujiunga na Queen’s Park Rangers.
Licha ya kukiri Wanyama ataondoka, Meneja wa Celtic, Neil Lennon, pia amekubali kuwa kuondoka kwa Wanyama kutaleta pengo kubwa kwao lakini itabidi wamruhusu ikiwa itakuja Ofa inayolingana na thamani ya Mchezaji huyo.

FC VITO YA LINDI INAKWENDA FINLAND KUCHEZA HELSINKI CUP 2013

 Logo ya klabu ya FC Vito iliyo chini ya Kituo cha Michezo cha Sports Development Aid (SDA), kilicho katika Manispaa ya Lindi.

 Mkurugenzi wa SDA, Chigogolo Mohammed (wa kwanza kulia nyuma), akiwa katika picha ya pamoja nje ya ofisi za kituo hicho na baadhi ya wachezaji wa FC Vito. Kushoto nyuma ni Mratibu wa SDA, Ramson Lucas na Kocha Jamal Lisuma.

 Mkurugenzi wa SDA, Chigogolo Mohammed (wa kwanza kushoto nyuma), akiwa katika picha ya pamoja na kikosi cha kwanza cha FC Vito. Kulia nyuma ni Mratibu wa SDA, Ramson Lucas na katikati ni Kocha Jamal Lisuma.

  Kocha wa FC Vito, Jamal Lisuma.

 Baadhi ya nyota wa FC Vito wakiwa katika meza ya chakula.

 Mratibu wa SDA, Ramson Lucas akiwanoa yoso wa FC Vito alipokamata kwa muda jukumu la Kocha Jamal Lisuma ambaye ndiye kocha wa kikosi hiki.

 Wazazi na walezi wa vijana wa timu ya FC Vito, wakiwa katika picha ya pamoja na wachezaji hao (waliovaa track-suit za bluu), katika hafla ya kuwaaga iliyofanyika mjini Lindi hivi karibuni.

 Juu: Wachezaji wa FC Vito wakimsikiliza mmoja wa wageni aliyetembelea mazoezi ya kikosi hicho na kupata nafasi ya kuzungumza nao. 

DAR ES SALAAM, Tanzania

Helsinki Cup ni michuano ya wiki moja kila mwaka, ambapo mwaka huu itahusisha zaidi ya timu za vijana 860 kutoka nchi 23 duniani, zitakazoumana katika soka la vijana wa kike na kiume walio chini ya miaka 11

TIMU ya soka ya vijana ya FC Vito ya Lindi Mjini, imetua jijini Dar es Salaam, ikiwa safari kuelekea Helsinki, Finland, inakokwenda kushiriki Michuano ya Kombe la Helsinki, linalotarajia kuanza kutimua vumbi Julai 8 na kumalizika Julai 13.

Akizungumza na Tanzania Daima kwa simu jana, Mkurugenzi wa Kituo cha Sports Development Aid (SDA), kinaichomiliki FC Vito, Mohammed Chigogola, alisema kuwa kikosi chake kinatarajia kuwa Dar es Salaam kwa siku mbili, kabla ya Jumatano kusafiri.

Aliongeza kuwa, wakiwa Dar, Jumanne wanatarajia kufanya mkutano na vyombo vya habari utakaofanyika Ubalozi wa Finland nchini, ambapo watatumia nafasi hiyo kuelezea mambo kadhaa yahusuyo safari yao hiyo.

Kwa mujibu wa Chigogola, Helsinki Cup ni michuano ya wiki moja kila mwaka, ambapo mwaka huu itahusisha zaidi ya timu za vijana 860 kutoka nchi 23 duniani, zitakazoumana katika soka la vijana wa kike na kiume walio chini ya miaka 11.

Chigogola aliongeza kuwa, msafara wa FC Vito utakuwa na jumla ya watu 15, wakiwamo viongozi watatu na wachezaji 12.

Aliwataja viongozi watakaosafiri na kikosi hicho pamoja nay eye kuwa ni Mratibu, Ramson Lucas na Kocha Mkuu Jamal Lisuma.

Akiwataja nyota waliochaguliwa kuwamo katika msafara huo, kocha Jamal Lisuma aliwataja kuwa ni  Mohammed Mussa, Osama Aman, Ramadhani Hassan, Abdul Mussa, Abdallah Mbade, Karim Bakiri, Juma Msafiri na Ashrafu Hassan.

Wengine ni pamoja na Mohammed Selemani, Hossam Hassan, Dominic William na nahodha Humphrey Lambaert. 10.

Katika mahojiano, Kocha Jamal anaenda mbali zaidi na kusema anajisikia furaha  kuwa kocha wa kikosi hicho, sio kutokana na kupata nafasi ya kusafiri, bali kwa namna viongozi wa kituo wanavyompa ushirikiano katika utekelezaji wa majukumu yake.

“Najivunia ushirikiano ninaopata katika kufanikisha program zangu. Uongozi unanisikiliza na kunipa kila ninachohitaji katika kuwezesha kikosi kuwa fiti kiakili, kimwili na kimbinu, hivyo kuwapa uwezo wa kupokea vema mafundisho yangu,” anafafanua Jamal.